Njuolggadusat
| Hjem | Om oss | Bli medlem | Kontakt |
WIKIMEDIA NORGGA NJUOLGGADUSAT
Mearriduvvon vuođđudančoahkkimis 23.06.2007.
Ođastuvvon jahkečoahkkimis 21.06.2008.
Ođastuvvon jahkečoahkkimis 19.04.2010
Ođastuvvon jahkečoahkkimis 26.04.2012
Ođastuvvon jahkečoahkkimis 26.04.2014
Ođastuvvon jahkečoahkkimis 17.04.2015
Ođastuvvon jahkečoahkkimis 07.04.2016
Ođastuvvon jahkečoahkkimis 09.03.2019
Ođastuvvon jahkečoahkkimis 06.03.2021
Ođastuvvon jahkečoahkkimis 04.02.2023
Ođastuvvon jahkečoahkkimis 10.02.2024
§ 1 Álgu
a) Organisašuvnna namma lea Wikimedia Norge. Wikimedia Noreg (ođđadárogiela) ja Wikimedia Norga (davvisámegiela) leat bálddalasti nammahámit.
b) Wikimedia Norge lea miellahttosearvi.
c) Dárogirjegiella, ođđadárogiella ja davvisámegiella leat ovttadássásaččat organisašuvnnas. Njuolggadusat galget gávdnot njeallji gillii dahje hápmái: dárogirjegillii, ođđadárogillii, davvisámegillii ja eŋgelasgillii. Njuolggadusat jorgaluvvojit dárogirjegiela veršuvnnas, mas lea ovdasadji jus šaddet erohusat mearkkašumiin.
§ 2 Ulbmil
a) Wikimedia Norgga ulbmil lea doarjut Wikimedia dárogielat ja sámegielat prošeavttaid dáinna lágiin ahte:
- čohkket ekonomalaš doarjagiid skeaŋkkaid ja doarjjaortnegiid bakte, ja juogadit dáid ruđaid.
- searvat jođiheames ovttasbarggu prošeavttaid gaskkas, ja maiddái ovttasbargat olgguldas oasseválddiiguin go dat lea ávkin Wikimedia prošeavttaide.
- sannet ovttasbargu Wikimedia prošeavttaiguin eará davviriikkaid ja riikkaidgaskasaččat.
- vuovdalit Wikimedia prošeavttaid.
- leat gulaskuddan bealálaš eiseválddiide ja organisašuvnnaide dahkkivuoigatvuođalaš gažaldagaid oktavuođas ja go Wikimedia-prošeavttat guoskkahuvvojit.
§ 3 Miellahttovuohta
a) Juohkehaš gii doarju searvvi ulbmila sáhttá šaddat miellahttun.
b) Jahkečoahkkin mearrida jahkásaš miellahttomávssu.
c) Stivra sáhttá lihccut miellahtuid mat bilidežžet Wikimedia Norgga dahje Wikipedia doaimmaid dahje beaggima. Jahkečoahkkin mearrida lihccuma, ja jahkečoahkkin lea maid guoddalanorgána. Lihcuhallon miellahtuin ii leat šat jienastanvuoigatvuohta, go eai šat atnojuvvo miellahttun. Lihccuhallon miellahtut eai ge sáhte doaibmat Wikimedia Norgga luohttamušvirggiin.
§ 4 Jahkečoahkkin
a) Wikimedia Norgga dábálaš jahkečoahkkin lágiduvvo jahkásaččat ovdal cuoŋománu loahpa. Stivra mearrida čoahkkináiggi, čoahkkinhámi, ja vejolaččat čoahkkinbáikki.
b) Jahkečoahkkin galgá almmuhuvvot searvvi neahttasiidduin unnimusat guokte mánu ovdagihtii ja šleađgapoastta bokte buot miellahtuide unnimusat vihtta vahku ovdagihtii.
c) Buot lahtuin lea čoahkkin- ja sárdnunvuoigatvuohta jahkečoahkkimis. Stivra sáhttá bovdet dárkojeddjiid, ja sii sáhttet oažžut sárdnunvuoigatvuođa jahkečoahkkima mearrádusa mielde.
d) Miellahtuin, geat leat máksán diimmá mávssu ja leat leamaš miellahttun unnimusat mánu ovdal jahkečoahkkima, lea jienastanvuoigatvuohta. Sii geain lea jienastanvuoigatvuohta ja geat eai sáhte searvat jahkečoahkkimii, sáhttet sáddet sadjásačča gii sáhttá jienastit fápmudusa vuođul. Sadjásaš sáhttá, muhto ii ferte, ieš leat jienastanvuoigatvuođalaš. Fápmudusskovvi ferte sáddejuvvot hálddahussii ovdal jahkečoahkkima. Ii ovttage jahkečoahkkimis sáhte leat eambbo go guokte jiena.
e) Buot miellahtuin geain lea jienastanvuoigatvuohta, lea vuoigatvuohta ovddidit áššiid jahkečoahkkimii. Áššit galget leat stivrras unnimusat golbma vahku ovdal jahkečoahkkima. Maŋimustá guokte vahku ovdal čoahkkima galget buot áššebáhpirat leat almmolaččat olámuttos.
f) Jahkečoahkkin galgá
- gieđahallat ja dohkkehit gohččuma ja áššelisttu
- válljet čoahkkinjođiheaddji, čálli, lohkankorpsa ja guokte beavdegirjji vuolláičálli
- gieđahallat ja dohkkehit
- stivrra jahkedieđáhusa
- stivrra dohkkehuvvon jahkerehketdoalu
- revišuvdnadieđáhusa
- bearráigeahččanlávdegotti raportta
- dohkkehit doaibmaplána
- mearridit bušeahta ja kontingenta
- gieđahallat áššiid mat leat boahtán
- čađahit válggaid nugo čilgejuvvo § 6:s.
g) Jus unnimus guoktelogi miellahtu dahje stivra gáibida, de galgá gohččot erenoamáš jahkečoahkkimii dábálaš jahkečoahkkima njuolggadusaid mielde. Erenoamáš jahkečoahkkin meannuda dušše áššiid man birra lea čállojuvvon čoahkkingohččumis.
§ 5 Stivra
a) Wikimedia Norgga stivrras leat gaskal vihtta ja čieža lahtu. Lassin válljejuvvojit gaskal okta ja golbma sadjásašlahtu jahkečoahkkima mearrádusa vuođul.
b.) Stivrras lea jođiheaddji, nubbinjođiheaddji ja gaskal golbma ja vihtta stivrralahtu. Jahkečoahkkin vállje jođiheaddji ja nubbinjođiheaddji. Dán lassin vuođđuda stivra ieš iežas.
c) Stivrra jođiheaddji ja guokte stivralahtu válljejuvvojit seamma jahkečoahkkimis, ja nuppe jagi jahkečoahkkin vállje sadjásaš jođiheaddji ja eará stivralahtuid. Buot stivralahtut válljejuvvojit guovtti jahkái, muhto sáhttet oanehat válgaáigodahkii válljejuvvot jus lea dárbbašlaš go galget čuovvut stivralahtuid molsuma nu movt dán teakstaoasis lea mearriduvvon.
Várremiellahtut válljejuvvojit ovtta jahkái.
d) Searvvi hálddahus gullá stivrii. Stivra galgá fuolahit dohkalaš organiserema doibmii. Stivra galgá ovddidit reviderejuvvon rehketdoalu dohkkeheapmái jahkečoahkkimis.
e) Jođiheaddji dahje nubbinjođiheaddji sáhttá gohččut stivračoahkkimii. Stivra doallá čoahkkimiid unnimusat golmma geardde jagis.
f) Mearrádusat dahkkojit dábálaš eanetloguin. Stivrras lea mearridanváldi go unnimusat bealli sis geain lea jienastanvuoigatvuohta ja jođiheaddji dahje nubbinjođiheaddji lea čoahkkimis. Go jienat leat dássálaga stivrras, de lea jođiheaddjis duppaljietna.
g) Bargiin lea riekti searvat stivračoahkkimiidda ovtta áicciláhttuin man bargit leat válljen bargiid gaskkas. Áicciláhttus lea ságastallan- ja evttohanvuoigatvuohta, muhto ii jienastanvuoigatvuohta iige stivrraovddasvástádus. Bargiid ovddasteaddji guođđá stivračoahkkima go stivra dan mearrida, go galget meannudit bargiide gullevaš ášši ja go bargoveahkapolitihkka mearriduvvo.
h) Beaivválaš jođiheaddjis lea vuoigatvuohta ja geatnegasvuohta searvat stivračoahkkimiida. Beaivválaš jođiheaddjis lea ságastallan- ja evttohanvuoigatvuohta, ii jienastanvuoigatvuohta iige stivrraovddasvástádus. Beaivválaš jođiheaddji guođđá stivračoahkkima go stivra dan mearrida.
i) Bearráigeahččanlávdegottis lea vuoigatvuohta háhkat dárkojeaddji, gean bearráigeahččanlávdegoddi lea válljen stivračoahkkimiin. Bearráigeahččanlávdegotti dárkojeaddjis lea sárdnun- ja evttohanvuoigatvuohta, ii jienastanvuoigatvuohta iige stivraovddasvástádus.
j) Jus stivrras dán áigodagas luhpet lahtut, ja stivrras ii leat šat mearrádusváldi, de galgá stivrra loahppa gáibidit erenoamáš jahkečoahkkima mas ođđa stivra válljejuvvo.
§ 6 Válggat
a) Jahkečoahkkin vállje stivrra § 5a–c mielde, válgalávdegotti § 7b mielde ja bearráigeahččanlávdegotti § 8b mielde.
b) Evttohasat berrejit leat almmuhuvvon guokte vahkku ovdal dábálaš válggaid.
§ 7 Válgalávdegoddi
a) Válgalávdegotti bargu lea evttohit evttohasaid daidda rabas virggiide mat leat, earret válgalávdegotti áirrasdoaimmaide. Evttohus manná stivrii, mii ovddida evttohusa jahkečoahkkimii.
b) Lávdegottis leat unnimusat golbma lahtu searvvis, mat válljejuvvojit guovtti jahkái. Unnimusat okta lahttu lea válggas juohke jagi, ja lea stivra mii evttoha kandidáhtaid rabas áirrasdoaimmaide.
c) Njuolggadusat man mielde válgalávdegoddi bargá, mearriduvvojit jahkečoahkkimis.
§ 8 Bearráigeahččanlávdegoddi
a) Bearráigeahččanlávdegotti bargun lea dárkkistit rehketdoalu ja stivrra barggu organisašuvnna njuolggadusaid ektui.
b) Lávdegottis leat unnimusat guovttis searvvi lahtuin, mat válljejuvvojit guovtti jahkái. Unnimusat okta lahttu lea válggas juohke jagi.
c) Bearráigeahččanlávdegotti bargui mearrida jahkečoahkkin.
§ 9 Njuolggadusrievdadusat
a) Njuolggadusrievdadusevttohusaid sáhttet jienastanvuoigatvuođalaš lahtut ja stivra ovddidit jahkečoahkkimii, § 4e vuođul.
b) Njuolggadusrievdadus lea mearriduvvon jus unnimusat 2/3 buot jienain dorjot rievdadusa.
§ 10 Heaittiheapmi
a) Wikimedia Norga heaittiheami sáhttá gieđahallat dušše dábálaš jahkečoahkkimis. Jus unnimusat 3/4 oassi jienain mearridit heaittihit, gohččojuvvo eahpedábálaš jahkečoahkkimii nugo § 4h dadjá. Jus heaittiheapmi galgá dáhpáhuvvat, de ferte mearrádus doppe geardduhuvvot 3/4 eanetloguin. Jus searvi heaittihuvvo, de galgá vejolaš báhcán ruđa máksit Wikimedia Foundationii.
b) Čielggadan dihte vejolaš vealgegáibádusaid searvvi vuostá, galgá ruhta sirdojuvvot áramusat guhtta mánu maŋŋil go heaittiheapmi mearriduvvui, jus buot gáibádusat leat máksojuvvon. Jus leat vealgegáibádusat searvvi vuostá máksojuvvo vejolaš ruhta áramusat guhtta mánu maŋŋil go mávssetkeahtes vealgi lea máksojuvvon.
|
|
